• AAI-Landing
  • AAI takeoff
  • Copy (2) of Jetstream ErnirAir-002 - Copy
  • Norlandair

Ráðstefna ECA í Brussel 27.-28. nóvember

Um 70 manns tóku þátt í tveggja daga ráðstefnu ECA, European Cockpit Association sem haldin var í Brussel í lok nóvember, en ECA er evrópski armur IFALPA. Á ráðstefnunni voru til umfjöllunar mörg helstu hagsmunamál flugmanna í álfunni. Farið var yfir stöðuna varðandi nýjar FTL reglur, mál tengd verktakaflugmönnum og málefni flugmanna RyanAir. Einnig voru til umræðu lagabreytingar ECA og farið yfir ársreikninga og fjárhagsáætlun fyrir næsta ár og ýmis önnur málefni. Hafsteinn Pálsson formaður FíA og Jóhannes B. Guðmundsson formaður Alþjóðanefndar sátu fundinn f.h. FÍA.

Félagsfundur á Grand Hótel

Félagsfundur FÍA verður haldinn á GrandHótel miðvikudaginn 6. nóvember n.k. kl. 20:00.

Félagsmenn eru hvattir til að mæta og taka þátt í umræðum um komandi kjarasamninga og önnur mál.

Veitingar verða á staðnum.

WOW orðið flugfélag!

WOW air er nú formlega orðinn flugrekstraraðili en eins og fram hefur komið í fjölmiðlum fengu þeir flugrekstrarleyfi sitt í í gær, þann 29. október. Þetta er fyrsta útgefna flugrekstrarleyfið fyrir áætlunarflug til og frá Íslandi í yfir 30 ár. Óskar FÍA félaginu til hamingju með áfangann og fagnar því að nú sé kominn nýr valkostur fyrir íslenska flugmenn sem hyggja á millilandaflug.

Samningur FÍA og Icelandair að losna

Kjarasamningur FÍA við Icelandair rennur út 30. nóvember n.k. og liggur nú viðræðuáætlun milli aðila fyrir. Búið er að halda einn samningafund þar sem umræður voru opnaðar og er næsti fundur fyrirhugaður eftir mánaðarmótin. Formaður samninganefndarinnar er Örnólfur Jónsson.

Nýjar FTL reglur samþykktar. Ekki til þess fallnar að auka flugöryggi

Evrópuþingið samþykkti í dag 9. október nýjar reglur um flug- vakt og hvíldartíma flugáhafna svokallaðar FTL. Forsvarsmenn flugáhafna í Evrópu hafa margsinnis vakið athygli á alvarlegum göllum í nýju reglum Evrópusambandsins eins og t.d. að leyfa næturvaktir allt að 12 klst og 30 mínútur þegar vísindamenn hafa lagt til að hámarkið væri 10 klst. Einnig geta flugmenn verið á bakvakt og í framhaldi af því verið kallaðir út á flugvakt sem gæti samanlagt verið allt að 22 klst samkvæmt reglunum.  

Þessi niðurstaða Evrópuþingsins kemur á óvart eftir að samgöngunefnd þingsins hafnaði nýju reglunum með miklum meirihluta í atkvæðagreiðslu fyrir um viku síðan. Ástæða sinnaskiptanna er rakin til þess að sá sem fer með málaflokkinn í Framkvæmdastjórn Evrópusambandsins kom fram með lítilsháttar breytingar á orðalagi í gær sem breyta í raun afar litlu. Hann m.a. staðfesti að það sem kallað hefur verið „non regression principle“ sem þýðir að einstaka Evrópuríkjum verður áfram heimilt að hafa strangari reglur en þær sem þarna eru settar.  

Sjá nánar fréttatilkynningu frá ECA hér.

Innskráning FÍA

Ef vandræði eru með innskráningu eða aðgangsheimildir hafðu samband við webmaster@fia.is