Aðalfundur Félags íslenskra atvinnuflugmanna verður haldinn fimmtudaginn 26. mars 2026, kl. 20:00 í Hlíðasmára 8, Sal Læknafélags Íslands, 201 Kópavogi.

Hefðbundin aðalfundadagskrá fer fram:

DAGSKRÁ

Kynning frambjóðenda.Stjórn félagsins gefur skýrslu um starfsemi félagsins.Lagðir fram endurskoðaðir reikningar félagsins.Lagabreytingar. (*)Stjórnarkjör.Kosið í störf þau sem aðalfundi hefur verið falið.Kosnir skulu tveir skoðunarmenn reikninga.Kosning í Starfsráð á þriggja ára fresti.Önnur mál.

Sæti formanns og fjögurra meðstjórnenda eru laus. Sjálfkjörið er í embætti formanns en kjósa þarf í embætti meðstjórnenda.

Eftirfarandi félagsmenn gefa kost á sér embættis formanns og meðstjórnenda.

Formaður:Jón Þór Þorvaldsson - ICE

Meðstjórnendur:

Alexander Olsen - ICE

Eðvar Ólafur Traustason - ICE

Guðmundur Óskar Bjarnason - ICE

Jónas Þór Guðmundsson - ICE

Vala Gauksdóttir - FÍ

Örnólfur Jónsson - ICE

16.grein laga FÍA segir: "Aðeins 5 félagsmenn frá hverjum samningsaðila FÍA geta tekið sæti í stjórn hverju sinni. Fái fleiri en 5 félagsmenn frá sama samningsaðila FÍA kosningu á aðalfundi skulu einungis þeir 5 er flest atkvæði hljóta taka sæti í stjórn. Þeir frambjóðendur er flest atkvæði hljóta frá öðrum samningsaðilum taka þá sæti í stjórn.

Kjörstjórn tekur ákvörðun um hvaða frambjóðendur teljast sjálfkjörnir í samræmi við ofangreint."

Léttar veitingar verða í boði eftir fundinn. Vonumst til að sjá sem flesta félagsmenn.

Í dag 16. janúar birtist frétt í fjölmiðlum þar sem vísað er til tilkynningar Icelandair um að flugfélagið hyggist hætta flugi til Istanbúl í Tyrklandi. Haft er eftir forstjóra félagsins að uppbygging flugleiðarinnar hafi krafist undanþágu frá kjarasamningi FÍA og Icelandair. Ennfremur segir forstjóri Icelandair að ástæðan sé sú að FÍA hafi dregið undanþágu þessa til baka frá og með 1. febrúar 2026.

Icelandair gerði samstarfssamning við Turkish Airlines í júní 2023. Í kjölfarið hófst undirbúningur að flugi Icelandair til Istanbúl sem var svo tilkynnt um í nóvember 2024. Alvarleg mistök voru gerð í þeim undirbúningi af hálfu Icelandair. Við áætlanagerð félagsins gleymdist að gera ráð fyrir lögbundnum hvíldartíma áhafna í Istanbúl. Icelandair hefði þó frá upphafi getað skipulagt þessi flug til Istanbúl innan ramma kjarasamnings og reglugerðar án undanþága.

Þegar mistökin uppgötvast í maí 2025 leitaði Icelandair til FÍA um undanþágu frá kjarasamningi. Sú undanþága var góðfúslega veitt enda er það hagur Icelandair og flugmanna að stuðla að vexti og uppgangi félagsins. Slíkar undanþágur frá kjarasamningum hafa ítrekað verið veittar án ágreinings í áratuga samningssambandi FÍA og Icelandair. Áætlunarflug Icelandair hófst svo haustið 2025 og hefur verið án vandkvæða. Um ástæður þeirrar afturköllunar sem um ræðir er rétt að útskýra nánar:

Kjarasamningur FÍA og Icelandair var undirritaður árið 2020. Síðastliðið haust ákvað Icelandair einhliða að hafna einu ákvæði samningsins. FÍA skaut því máli til Félagsdóms sem úrskurðaði þann 10. des sl. að þáverandi formann samninganefndar Icelandair hafi skort umboð og umrætt ákvæði því ekki hluti kjarasamnings. Hæstiréttur staðfesti þann úrskurð. Þessi málatilbúnaður var hvorki að ósk né frumkvæði FÍA en hefur þær afleiðingar að allar undanþágur eru nú lagalega ógildar, þ.m.t. sú undanþága sem FÍA veitti í góðri trú vegna fluga til Istanbúl.

Ákvörðun um að fella niður flug á Istanbúl er alfarið á ábyrgð stjórnenda félagsins og byggir á mistökum stjórnenda sem nú er gerð tilraun til að varpa yfir á flugmenn. Ekkert í núverandi kjarasamningi kemur í veg fyrir áframhaldandi flug Icelandair til Istanbúl og öll vísan í sök FÍA í því máli eingöngu yfirvarp. Stjórn og félagsmenn FÍA harma ákvörðun Icelandair og hafna alfarið ásökunum um hlut FÍA í þeirri ákvörðun.

Fh. Stjórnar FÍA

Jón Þór Þorvaldsson

Formaður

Öryggisnefnd Félags íslenskra atvinnuflugmanna stendur árlega fyrir ráðstefnunni ,,Reykjavik Flight Safety Symposium".

Markmið ráðstefnunnar er að miðla fróðleik og skapa vettvang fyrir umræðu um þau málefni sem varða flugiðnaðinn á hverjum tíma. Ráðstefnan dregur til sín fjölbreyttan hóp úr flugiðnaðinum, alls staðar að úr heiminum. Þátttaka síðustu ár hefur farið fram úr björtustu væntingum og ljóst að umfjöllunarefnið höfðar til fjölbreytts áheyrendahóps, m.a. flugumferðarstjóra, flugfreyju og -þjóna, flugvirkja, flugmanna og aðila úr stjórnsýslunni.

Fyrirlesarar á ráðstefnunni í ár eru: 

Dr. Kristinn R. Þórisson, Háskólinn í Reykjavík og Vitvélastofnun Íslands ses: Flugvélar, öryggi og gervigreind: Uppskrift að bjartri framtíð eða forsendubresti?Friðfinnur Freyr Guðmundsson, ISAVIA ANS: Viðbúnaðarþjónusta ISAVIA ANSRagnar Guðmundsson, RNSA: Uncontrolled descentBirta Líf Kristinsdóttir, Veðurstofa Íslands: Veðrið í tyrkneska atvikinu og hröð þróun flugveðurgagna síðustu árin.Elísabet Eggertsdóttir, Samgöngustofa: State Safety ProgramÞorgrímur Sigurðsson, Flugvirkjafélag Íslands: Flugvirkjar - Certifying staff (CRS)Jóhann Wium, flugsálfræðingur: Geðheilbrigði og flugöryggi - getur vont skap valdið flugslysum?Jón Hörður Jónsson, formaður Öryggisnefndar FÍA: Yfirlit og lokaorð

Eins og fyrri ár mun Starfsmenntasjóður styrkja félagsmeðlimi FÍA og greiða fyrir miðaverð. Skráning fyrir félaga FÍA fer fram hér: Skráning á Reykjavík Flight Safety Symposium 2025

Almenn miðasala fer svo fram í gegnum tix.is https://tix.is/event/20437/reykjavik-flight-safety-symposium. 

Ráðstefnan hefst kl. 9:00 og lýkur um 15:30. Aðgangseyririnn er 9.900 krónur. Hádegishlaðborð og léttar veigar á ráðstefnunni er innifalið í verðinu.

Nánari upplýsingar um dagskrá og fleira má sjá hér: https://www.fia.is/umfia/rfss/