Fréttir

Skrifstofa Félags íslenskra atvinnuflugmanna er lokuð milli jóla og nýárs.
Skrifstofan opnar aftur 2. janúar 2014.

Um 70 manns tóku þátt í tveggja daga ráðstefnu ECA, European Cockpit Association sem haldin var í Brussel í lok nóvember, en ECA er evrópski armur IFALPA. Á ráðstefnunni voru til umfjöllunar mörg helstu hagsmunamál flugmanna í álfunni. Farið var yfir stöðuna varðandi nýjar FTL reglur, mál tengd verktakaflugmönnum og málefni flugmanna RyanAir. Einnig voru til umræðu lagabreytingar ECA og farið yfir ársreikninga og fjárhagsáætlun fyrir næsta ár og ýmis önnur málefni. Hafsteinn Pálsson formaður FíA og Jóhannes B. Guðmundsson formaður Alþjóðanefndar sátu fundinn f.h. FÍA.

WOW air er nú formlega orðinn flugrekstraraðili en eins og fram hefur komið í fjölmiðlum fengu þeir flugrekstrarleyfi sitt í í gær, þann 29. október. Þetta er fyrsta útgefna flugrekstrarleyfið fyrir áætlunarflug til og frá Íslandi í yfir 30 ár. Óskar FÍA félaginu til hamingju með áfangann og fagnar því að nú sé kominn nýr valkostur fyrir íslenska flugmenn sem hyggja á millilandaflug.

Kjarasamningur FÍA við Icelandair rennur út 30. nóvember n.k. og liggur nú viðræðuáætlun milli aðila fyrir. Búið er að halda einn samningafund þar sem umræður voru opnaðar og er næsti fundur fyrirhugaður eftir mánaðarmótin. Formaður samninganefndarinnar er Örnólfur Jónsson.

Í tilefni af því að liðin eru 70 ár frá því Þristinum TF-NPK var rennt út úr verksmiðju Douglas í Bandaríkjunum efna DC-3 Þristavinir til afmælishátíðar í Flugsafninu á Akureyri þriðjudaginn 1. október klukkan 17 til 19 næstkomandi. Hátíðin er öllum opin og er flugáhugafólk hvatt til að sækja hana.

Greint verður frá tilurð og sögu DC-3 hjá bandarísku Douglas verksmiðjunum, þessari þekktu flugvél sem þjónaði í farþega- og flutningaflugi um heim allan fyrir og eftir síðari heimsstyrjöld. Þá verður fjallað um hlutverk Þristsins í samgöngu- og landgræðslusögu Íslendinga og sýnd mynd um Þristinn í landgræðslu. Þristurinn sem skráður var á Íslandi árið 1946 sem TF-ISH og ber nú einkennisstafina TF-NPK og heitir núna Páll Sveinsson. Fyrst eftir að hún kom til Íslands var hún notuð af her Bandaríkjanna, var síðar í eigu Flugfélags Íslands sem notaði hana til innanlandsflugs og flugs til Grænlands. Á síðasta æviskeiði sínu í formlegri vinnu sinnti hún landgræslu í 33 sumur og lauk því verkefni árið 2006. Nú er hún í umsjá DC-3 Þristavina og notuð til sýningar- og kynningarflugs. Er vélin einstaklega vel á sig komin enda góður hópur tæknimanna, flugmanna og annarra sem sér um að halda henni gangandi með góðum stuðningi fjölmargra aðila. Á hátíðinni verður boðið upp á kaffiveitingar og Páll Sveinsson verður til sýnis í Flugsafni Íslands þar sem segja má að heimili hennar sé.

Þristavinir hvetja alla sem mögulega geta til að sækja hátíðina. Flugfélag Íslands býður afslátt og skulu bókanir fara fram gegnum netpóstinn hopadeild@flugfelag.iseða í síma 570 3075.

Svo virðist vera að stefna borgarstjórnar Reykjavíkur sé að gera Reykjavíkurflugvöll óstarfhæfan, án þess að hafa haldbæra lausn á því vandamáli. Ekki hefur verið tekið tillit til álits fagaðila í þessu umfangsmikla máli þrátt fyrir skýrslur og ráðstefnur um málið.

FÍA undrast þá stefnu borgarstjórnar Reykjavíkur að vega að atvinnustarfsemi og störfum í Reykjavík, bæði vegna félagsmanna sinna, sem og annarra. Á þetta ekki síst við í ljósi þess efnahagsástands sem við búum við. Með fyrirhugaðri lokun flugbrautar eða flugvallarins í heild sinni tapast störf og starfsemi þeirra fyrirtækja er þar starfa. Bein afleiðing þess er aukið atvinnuleysi og minnkandi tekjur.

Hugmyndir um að loka annarri aðalflugbraut Reykjavíkurflugvallar, eins og gert hefur verið ráð fyrir í aðalskipulagi Reykjavíkurborgar, þýðir einfaldlega að nýtingarstuðullinn fer niður fyrir þann sem ásættanlegur er til flugreksturs og mun marka endalok flugreksturs í Reykjavík sem við þekkjum í dag. Að loka Reykjavíkurflugvelli án þess að hafa annan sambærilegan flugvöll í hans stað er óábyrgt.

FÍA undrast að enn og aftur beinist umræðan að flugvelli á Hólmsheiði sem fýsilegum kosti, þrátt fyrir að fram hafi komið upplýsingar um að Hólmsheiði uppfylli alls ekki kröfur sem gerðar eru til flugvallarstæðis. Þar má nefna skýrslu Isavia um hugsanlegan flutning vallarins á Hólmsheiði.

Ennfremur bendir FÍA á að Reykjavíkurflugvöllur gegnir mikilvægu hlutverki sem varavöllur fyrir Keflavíkurflugvöll. Að sama skapi gegnir Keflavíkurflugvöllur mikilvægu hlutverki sem varavöllur fyrir Reykjavíkurflugvöll, sem er forsenda fyrir innanlandsflugi um Reykjavíkurflugvöll.

Ljóst er að ef innanlandsflug og sjúkraflug, eins og við þekkjum í dag, eigi að vera til staðar í framtíðinni, þarf til þess flugvöll og er enginn annar hentugri en sá sem fyrir er í Vatnsmýrinni, enn sem komið er. Einnig vill FÍA minna á að Reykjavíkurflugvöllur gegnir mikilvægu hlutverki í almannavörnum Íslands.

FÍA lýsir yfir eindregnum stuðningi við hópinn „Hjartað Í Vatnsmýri" og hvetur alla landsmenn til að kynna sér efnið á síðunni www.lending.is.