Fréttir

Ný samninganefnd FÍA við Norlandair hefur verið skipuð:

Högni B. Ómarsson, formaður.

Örnólfur Jónsson. 

Davíð Smári Jóhannsson.

Halla Kristjánsdóttir.

Jónas Einar Thorlacius tekur við stöðu framkvæmdastjóra FÍA af Matthíasi Sveinbjörnssyni 1. nóvember nk. og mun sinna starfinu tímabundið til 1. júní 2021 þegar Lára Sif Christiansen snýr aftur til starfa eftir barneignarleyfi.

Jónas er 42 ára gamall og hóf störf sem flugmaður fyrir Icelandair árið 2006. Hann hefur starfað sem flugstjóri hjá félaginu frá árinu 2017 og sat í stjórn FÍA frá 2017 til 2020. Jónas er að auki menntaður viðskiptafræðingur frá Háskóla Íslands en hann lauk BS gráðu í viðskiptafræði árið 2018.

Stjórn FÍA hlakkar til samstarfsins með Jónasi sem er góður liðsauki fyrir skrifstofu FÍA. Jónas er öllum hnútum kunnugur í starfsemi stéttarfélagsins vegna fyrri starfa og er boðinn innilega velkominn. Stjórn

FÍA vill við þetta tækifæri þakka Matthíasi Sveinbjörnssyni fyrir frábært samstarf og óska honum velfarnaðar á nýjum vettvangi hjá Icelandair, en hann tekur aftur við sem forstöðu-maður tekjustýringar hjá Icelandair.

Það var ánægjuleg sjón sem blasti við borgarbúum þegar nýleg breiðþota flugfélagsins Atlanta sveif tignarlega yfir höfuðborgarsvæðið fyrr í dag. Vélin kom til félagsins í ágúst sl. en í heildina eru 9 samskonar fraktvélar í rekstri hjá Atlanta. Tegundin er Boeing 747-400.

Að sögn Baldvins Más Hermannssonar, forstjóra Air Atlanta, hefur fraktflugið gengið vel að undanförnu og er vélin önnur tveggja fraktflugvélaga sem hafa bæst við flota Atlanta á mjög stuttum tíma.

Um þessar mundir starfa 240 flugmenn hjá félaginu sem skapa mikilvægar gjaldeyristekjur fyrir þjóðarbúið.

Vélin stoppar stutt á landinu en hún heldur áfram för sinni til Hahn í Þýskalandi seinnipartinn í dag.

Við þökkum Atlanta kærlega fyrir gleðja borgarbúa og minna okkur á mikilvægi íslensks flugrekstar fyrir land og þjóð.

ATH BREYTTA DAGSETNINGU! Lífið í grasrótinni - Fundur um flugöryggi í einkaflugi - er nú haldinn í annað sinn, þriðjudaginn 9. júní kl. 20:00 í Grjótnesi. Erindi halda Matthías Sveinbjörnsson, forseti Flugmálafélags Íslands, og Sigurjón Valsson, flugstjóri hjá Atlanta. Léttar veitingar í boði.

Flugmenn samþykktu breyttan kjarasamning við Icelandair með yfirgnæfandi meirihluta en rafrænni kosningu lauk kl. 16:00, föstudaginn 22. maí. Þátttakan var 96% en 96.22% þeirra sem svöruðu voru samþykk samningnum og telst hann því samþykktur. 2.6% kusu gegn honum og 1.18% skiluðu auðu atkvæði.

„Það er mikil ánægja að sjá samstöðu okkar fólks á þessum erfiðu tímum. Icelandair er og verður mikilvægur hluti af efnahagslífi Íslands og hryggjarstykkið í öflugri viðspyrnu í kjölfar faraldursins sem lamað hefur flugsamgöngur undanfarna mánuði,“ segir Jón Þór Þorvaldsson, formaður Félags íslenskra atvinnuflugmanna.

Nýr kjarasamningur FÍA við Icelandair Group hf. / Icelandair ehf. lá fyrir á fjórða tímanum í morgun.

Lokafrágangur stendur nú yfir og stefnt er að því að kynna breytingar og hefja kosningu svo fljótt sem auðið er.